2024-11-06 07:49:06
رۆژا شەمبی رێکەفتی 26/10/2024، شاندەکێ ژوورا بازرگانی و پیشەسازی یا دهۆکێ ب سەرۆکایەتییا رێزدار شوکری جەمیل، سەرۆکێ ژوورێ و ب ئەندامەتییا؛ رێزدار مەسعوود سلێمان، جێگرێ سەرۆکێ ژوورێ و رێزداران؛ ئەڤراز بەهجەت، خالد حاجی و هەڤال محەمەد ئەندامێن جڤاتا ژوورێ و ئایدن عەبدولرەحمان، رێڤەبەرێ ژوورێ سەرەدانا ژوورا بازرگانی و پیشەسازی یا باژارێ ئارادێ ل رۆمانیا کر و ژ لایێ رێزدار جۆرج سیکۆلیج، سەرۆکێ ژوورا ئارادێ و ئەندامێن وێ ڤە ب گەرمی هاتنە پێشوازیکرن.
پشتی پێشوازیێ دانوستاندن ل سەر کۆمەکا تەوەرێن گرنگ هاتەکرن. سەرۆکێ ژوورێ ب هویری باژارێ دهۆکێ و سێکتەرێن بازرگانی و پیشەسازی یێن وێ دانەنیاسین و داخواز کر کو بازرگانێن رۆمانی بۆ دیتنا دەرفەتێن وەبەرهێنانێ قەست بکەنێ و ئالوگوریا بازرگانی خورت ببیت.
سەرۆکێ ژوورا ئارادێ ژی دیارکر، دهۆک د دەمەکێ کێم دا شیایە د سێکتەرێن جودا جودا دا گەلەک پێشبکەڤیت و ئەم ژی ژ لایێ خۆ ڤە دێ بزاڤێ کەین کو بازرگانێن خۆ بۆ وەبەرهێنانا ل دهۆکێ پال بدەین و دەرگەهێ مە ژی بۆ بازرگانێن دهۆكێ و شیانێن وان یێن وەبەرهێنانێ یێ ڤەکریە.
پاشی هەردو لایان سەرەدانا کارگەهەکا مەزن یا ئامیرەیێن چاندنیێ کر. سەرۆکێ ژوورێ داخواز ژێ کر کو سەرەدانا دهۆکێ بکەن و ژ نێزیکڤە دەرفەتێن کارکرنێ ڤەکۆلن. ژ لایەکێ دی ڤە، بازرگانێن دهۆکێ کار و بازرگانیا خۆ دا نیاسین و ب هویری ڤەکۆلینا پێدڤیاتیێن بازرگانی کر.
