2021-01-10 14:57:13
لە دوایین ساتی مامەڵەی بازاڕەکانی بۆرسەی ئەمریکا بەهای پشکەکانی کۆمپانیای تێسلا، تایبەت بە بەرهەمهێنانی ئۆتۆمبیلی کارەبایی بەڕێژەی 5.6٪ بەرزبووەوە ئەوەش بووە هۆکاری ئەوەی بەهای کۆمپانیای تێسلا بۆ یەکەمجار بەرزبێتەوە بۆ 800 ملیار دۆلار.
بەرزبوونەوەی بەهای پشکەکانی کۆمپانیای تێسلا بووە هۆکار بۆ ئەوەی ئێلۆن مەسک، دامەزرێنەری کۆمپانیاکە ببێتە یەکەم دەوڵەمەندی جیهان و پلەی یەکەم لە لیستی دەوڵەمەندەکانی جیهان بگرێتەوە بەو پێیەی مەسک خاوەنی 21٪ـی پشکەکانی کۆمپانیاکەیە.
سەرەڕای ئەوەی قەبارەی بەرهەمهێنانی کۆمپانیای تێسلا بەراورد بە کۆمپانیا و براندە گەورەکانی جیهان وەکو تۆیۆتا و فۆلۆکس ڤایگن زۆر کەمە، بەڵام لەبەر ئەوەی پێشبینی دەکرێت خواست بۆ ئۆتۆمبێلی کارەبایی لە چەند ساڵی داهاتوودا بەخێرایی زیاد بێت، بەهای پشکەکانی کۆمپانیای تێسلا بەڕێژەیەکی بەرچاو بەرزبووەتەوە و تەنیا لەمساڵدا بەراورد بە ساڵی رابردوو 10 هێندە زیادیکردووە.
رۆژی پێنجشەممەی رابردوو ئێلۆن مەسک، ریزبەندی دەوڵەمەندترین کەسی لە جێف بێزۆس، خاوەنی کۆمپانیای ئەمازۆن وەرگرت و بە سەرمایەی نزیکەی 190 ملیار دۆلار، بووە دەوڵەمەندترین پیاوی دونیا.
کۆی سەرمایەی ئێلۆن مەسک دامەزرێنەری کۆمپانیای تێسلا و خاوەنی سپەیس ئێکس بۆ تەکنەلۆژیا، گەیشتە 188.5 ملیار دۆلار، بەم شێوەیە بە 1.5 ملیار دۆلار پێش جێف بێزۆس، خاوەنی کۆمپانیای ئەمازۆن کەوت، کە لە مانگی تشرینی یەکەمی ساڵی 2017 یەکەم دەوڵەمەندترین کەس بووە. ئێلۆن مەسک لە ریتوویتێکدا کە لەبارەی بوونە یەکەم دەوڵەمەنترین کەس لەسەری کراوە نووسیویەتی: "چۆن؟ سەیرە!".
